ناواخؤ بۊ.. هيتؤ ىوارکي بۊ... کلمه'نه سر فيکر نۊکۊده بۊم، اۊشنه دچين وأچين نۊکۊده بۊم، هيته ىوارˇکي بۊ که اتفاق دکت. ىعني اصن فيکر نۊکۊده بۊم که هسا خا چي زواني گب بزنم بأ چۊتۊ جمله بندي بۊکۊنم ؤ.. . ناواخؤ بۊ.. هیتؤ ناواخؤ گيلکي گب بزم. مي گب زني که تۊمنا بۊ تازه واخؤ بۊبؤم که گيلکي گب بزم و تا چنرۊزي کئفۊر بۊم اي اتفاقˇجي.
دير راه دکتم. چندسالˇ پسي که گيلکي جي درگيرم ؤ کش زئدرم گيلکي گب بزنم و نؤنم مي کمکاري سر بۊ ىا مي خنگي ؤ بي استعدادي سر و ىا مي تامأچه بؤنˇ سر که اين همه سال درازه بئته کي گيلکي گب بزنم أمما سراخر گيلک بۊبؤم.
چنرۊزي کئفۊر بۊم اي اتفاقˇجي ؤ کئفۊر اينˇجي که دکتم سرازيري گيلکي گب زئنˇ مئن. أمما مي تش کي دکت هنده مي أجي فکر بۊدم کي خا ايسه چي بۊبؤن، هسا گيلک ىا فارس چي فرقي کۊنه؟  اين همه جؤنکنش چي وأسي؟ و بازين هزار ؤ ىته دليل مره بأردأم که چرا خا گيلکي گب بزنم و ايشنه مئن ىکچي ايسه که اۊنˇ مئن جاى بحث دنىه؛ بخشي مي عواطف گيلکي جي تۊشکه بۊخۊرده نأ ؤ اي عواطف ارضا بؤنˇ وأسي نياز دانم کي گيلکي گب بزنم و نياز دانم کي گيلکي بشتۊأم ؤ بشتؤأم ؤ بشتؤأم تا جؤنأگيرم

           چارشنبه ۱۵۹۰ اریه ما ۳